काठमाडौं — माबिलुङ इनर्जी लिमिटेडले आगामी असार २२ गतेदेखि आईपीओ निष्कासन गर्ने भएको छ। कम्पनीले आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपाली नागरिकलाई लक्षित गर्दै सेयर सार्वजनिक गर्न लागेको हो।

कम्पनीले ३८ करोड ५८ लाख २४ हजार रुपैयाँ जारी पूँजीको ४८.९९९८ प्रतिशत बराबरको १८ लाख ९० हजार ५३० कित्ता साधारण शेयर निष्कासन गर्न अनुमति पाएको हो।

जसमध्ये ३ लाख ८५ हजार ८२४ कित्ता आयोजना प्रभावित क्षेत्रका स्थानीय बासिन्दाका लागि र १ लाख ५० हजार ४७१ कित्ता वैदेशिक रोजगारीमा रहेका नेपालीहरूका लागि छुट्याइएको छ।

शेयरको मूल्य प्रतिकित्ता १०० रुपैयाँ तोकिएको छ। आवेदन दिन न्यूनतम १० कित्ता र अधिकतम ५० हजार कित्ता तोकिएको छ।

स्थानीय बासिन्दाका लागि सेयर निष्कासन साउन ४ गते (छिटो) र साउन १९ गते (ढिलो) सम्म खुला रहनेछ। वैदेशिक रोजगारीमा रहेका नेपालीले साउन ४ गतेसम्म आवेदन दिनुपर्नेछ।

आवेदन गर्न मादि नगरपालिका–७, ८, ९ र चैनपुर नगरपालिका–२, ३, ७, ८, ९ मा स्थायी बसोबास प्रमाणित गर्नुपर्नेछ। आवेदन फारम शुल्क २ रुपैयाँ तोकिएको छ।

शेयर निष्कासन तथा बिक्री प्रबन्धक लक्ष्मी सनराइज क्यापिटल लिमिटेड हो। वैदेशिक रोजगारीमा रहेका नेपालीले सि-आस्बा प्रणालीमार्फत आवेदन दिन सक्नेछन्।

यस कम्पनीलाई ICRA Nepal बाट ‘ICRA NP Issuer Rating B+’ दिइएको छ, जसले औसत जोखिम संकेत गर्दछ।

कम्पनीको ४.९५ मेगावाटको माथिल्लो पिलुवाखोला–३ जलविद्युत आयोजनाको कुल लागत १ अर्ब १३ करोड ६० लाख रुपैयाँ रहेको छ। उक्त आयोजनाको विद्युत अनुमति अवधि ३१ वर्ष बाँकी छ।