काठमाडौं – प्रधानमन्त्री केपी शर्मा ओलीले सरकारले शिक्षकहरूको जायज मागहरू सुनुवाइ गर्ने स्पष्ट संकेत दिएका छन्। थाइल्याण्डको औपचारिक भ्रमण सकेर स्वदेश फर्किएपछि त्रिभुवन अन्तर्राष्ट्रिय विमानस्थलमा सञ्चारकर्मीहरूसँग कुराकानी गर्दै प्रधानमन्त्री ओलीले आन्दोलनमा उत्रिएका शिक्षकप्रति धन्यवाद व्यक्त गरे।

उनले शिक्षकहरू सरकारले आफ्ना आवाज सुन्छ भन्ने विश्वासका साथ आन्दोलनमा उत्रिएको भन्दै यो कदमप्रति सकारात्मक प्रतिक्रिया दिए। उनका अनुसार अघिल्ला सरकारहरूप्रति विश्वास नभएकाले पहिले शिक्षकहरूले आन्दोलन नगरेको तर अहिलेको सरकारबाट अपेक्षा भएकाले सडकमा उत्रिएको देखिन्छ। "सरकार शिक्षकविरोधी होइन, शिक्षकहरू पनि सरकारविरोधी होइनन्," प्रधानमन्त्रीले भने, "समस्याहरू छलफलबाट समाधान गरिन्छ।"

ओलीले शिक्षकहरूका मागहरूबारे परस्पर छलफल गरिने र मिलेर समाधान खोजिने बताएका छन्। उनले शिक्षकहरूका तर्फबाट सानो प्रतिनिधिमण्डल आएर कुरा राख्दा पनि हुने थियो भन्ने उल्लेख गर्दै ठूलो संख्यामा काठमाडौं आएर धर्ना दिनुपर्ने अवस्था नआएको बताउनुभयो। तर, सरकार अघिल्ला झैँ बेवास्ता गर्छ कि भन्ने डरले ठूलो सहभागिता भएको हुनसक्ने उनले संकेत गरे।

प्रधानमन्त्रीले आन्दोलनमा आएको शिक्षक समुदायप्रति विश्वास व्यक्त गर्दै सरकारले सकारात्मक दृष्टिकोण राख्ने बताए। साथसाथै, राजधानी आएर दुःख नगरिदिन आग्रह गर्दै समस्याको समाधान संवादमार्फत हुने प्रतिवद्धता जनाए।