काठमाडौं - अमेरिकी सरकारले एमसीसी र युएसएडजस्ता परियोजनाको बजेट ९० दिनका लागि रोक्दा नेपालमा सञ्चालित महत्वपूर्ण आयोजना अवरुद्ध भएका छन्। एमसीसीमार्फत ५० करोड डलर अनुदानको योजना थियो, जसमा नेपाल सरकारले १३ करोड डलर थप्ने व्यवस्था थियो। तर, अनुदान रोकिएपछि ऊर्जा तथा सडक पूर्वाधारका विभिन्न आयोजना प्रभावित भएका छन्।

४०० केभी क्षमताको विद्युत् प्रसारण लाइन निर्माण योजनाअन्तर्गत लप्सीफेदी–नुवाकोट–हेटौंडा–दमौली–बुटवल–भारत सीमासम्मको प्रशारण लाइन र तीनवटा सबस्टेशन निर्माण रोकिएको छ। यसका लागि ४० करोड डलर खर्च गरिने योजना थियो।

सडकतर्फ पूर्व–पश्चिम राजमार्गको चन्द्रौटा–लमही–शिवखोला खण्डको १०० किलोमिटर स्तरोन्नति तथा बुटवल–गोरखपुर अन्तरदेशीय प्रसारण लाइन निर्माण पनि प्रभावित भएको छ।

युएसएडको स्वास्थ्य, कृषि, शिक्षा, र समावेशी नीति परियोजनाहरू समेत ठप्प छन्। स्वास्थ्य क्षेत्रमा ४२५ मिलियन, कृषि क्षेत्रमा ४२१ मिलियन, र शिक्षामा ४८५ मिलियन डलर लगानी प्रतिबद्धता थियो। यी परियोजनाहरू सीमान्तकृत समुदायलाई केन्द्रित थिए।

अर्थ मन्त्रालयका सहसचिव श्यामप्रसाद भण्डारीका अनुसार हाल सरकार पर्ख र हेरको अवस्थामा छ। वैकल्पिक स्रोत खोज्ने प्रयास अझै नभएको तर दीर्घकालीन अवरोध आएमा त्यसबारे छलफल हुन सक्ने उनले बताए।