काठमाडौं । चालु आर्थिक वर्ष २०८१/८२ को जेठ महिनासम्म नेपालले १६ खर्ब ४४ अर्ब रुपैयाँको आयात गरेको छ भने निर्यात २ खर्ब ४७ अर्ब रुपैयाँ पुगेको छ। भन्सार विभागले सार्वजनिक गरेको तथ्यांक अनुसार, यो निर्यात अघिल्लो वर्षको सोही अवधिको तुलनामा १३ प्रतिशतले वृद्धि भएको हो।

गत वर्षको यही अवधिमा नेपालले १४ खर्ब ५३ अर्ब रुपैयाँको वस्तु आयात गरेको थियो भने निर्यात १ खर्ब ३९ अर्ब रुपैयाँ मात्रै भएको थियो।

निर्यातको योगदान आयातको तुलनामा अझै न्यून भए पनि निर्यात वृद्धिदर उल्लेखनीय देखिएको छ। तथ्यांक अनुसार निर्यात करिब १ अर्ब रुपैयाँले वृद्धि भई ७७.७७ प्रतिशतले बढेको हो।

तर, आयात अझै उच्च भएकाले व्यापार घाटा पनि बढिरहेको छ। चालु आर्थिक वर्षको जेठसम्म व्यापार घाटा १३ खर्ब ९७ अर्ब रुपैयाँ पुगेको छ, जुन अघिल्लो वर्षको सोही अवधिको १३ खर्ब १४ अर्ब रुपैयाँभन्दा ६ प्रतिशतले बढी हो।

यस अवधिमा कुल व्यापारमा निर्यातको हिस्सा करिब १३ प्रतिशत मात्र रहेको छ भने आयातको हिस्सा करिब ८७ प्रतिशत रहेको देखिन्छ।