काठमाडौं – नेपाल विद्युत् प्राधिकरणले पछिल्लो केही दिनदेखि औद्योगिक क्षेत्रमा नियमित विद्युत् आपूर्ति गर्न थालेपछि उद्योगीहरू खुशी भएका छन्। फेडेरेसन अफ नेपाल एक्स्पोर्ट एसोसिएसनले औद्योगिक क्षेत्रमा लोडसेडिङ समस्या समाधानमा प्राधिकरणको पहलप्रति आभार व्यक्त गरेको छ।

एसोसिएसनका अनुसार विगतमा लोडसेडिङका कारण उत्पादनमूलक उद्योगहरू प्रभावित भएका थिए। विद्युत् आपूर्तिमा आएको सुधारले निर्यात उद्योगहरूलाई क्षमताअनुसार उत्पादन गर्न सहज भएको तथा राज्यको राजस्व वृद्धिमा सहयोग पुग्ने अपेक्षा गरिएको छ।

विद्युत् आपूर्ति सहज बनाउन नेपाल विद्युत् प्राधिकरणले छिमेकी मुलुक भारतबाट आवश्यक मात्रामा विजुली आयात गरेको छ। यसले उद्योगहरूलाई चौबिसै घण्टा विद्युत् आपूर्ति सुनिश्चित गर्ने अपेक्षा गरिएको एसोसिएसनको विज्ञप्तिमा उल्लेख छ।

स्वदेशी कच्चा पदार्थ तथा उत्पादन प्रवर्द्धन, आयात प्रतिस्थापन, रोजगारी सृजना र उद्यमशीलताको विस्तारमा निर्यातमुखी उद्योगहरूले महत्त्वपूर्ण योगदान दिँदै आएका छन्। तथापि, सरकारबाट निर्यातमा प्रदान गरिने नगद सहुलियत रकम लामो समयदेखि रोकिएको प्रति एसोसिएसनले गुनासो गर्दै छिटो निकासा गर्न आग्रह गरेको छ।