तीन दिनसम्म निरन्तर वर्षा हुने

काठमाडौं, १२ असार -बुधबार रातिदेखि नेपाल–भारत सीमा क्षेत्रका विभिन्न स्थानमा निरन्तर वर्षा भइरहेकाले त्यस क्षेत्रमा बाढी र डुबानको खतरा बढ्दै गएको छ ।
अब लगातार तीन दिनसम्म ती क्षेत्रसहित नेपालका विभिन्न भूभागमा निरन्तर वर्षा हुने मौसम पूर्वानुमान महाशाखाले जनाएको छ । महाशाखाका अनुसार हाल मनसुन सक्रिय भएकाले देशभर बदली भई वर्षा हुने क्रम जारी छ । बीच–बीचमा रोकिए पनि वर्षा जारी रहने छ ।

सुदूरपश्चिममा तुलनात्मक रूपमा कम वर्षा भए पनि गण्डकी, बाग्मती प्रदेश, प्रदेश १ र २ का विभिन्न क्षेत्रमा तीन दिन भारी वर्षा हुनसक्छ । योसँगै तराईको चुरे क्षेत्रमा लगातार वर्षा भइरहेको मौसमविद् वरुण पौडेलले जानकारी दिए ।यो खबर आजको गोरखपत्र दैनिकमा छापिएको छ ।

यसरी पहाडी भेगसँगै तराई क्षेत्रमा निरन्तर वर्षा भइरहेकाले तराईका नेपाल–भारत सीमा क्षेत्रका नदीमा बहाव बढ्ने क्रममा रहेको बाढी पूर्वानुमान महाशाखाले जनाएको छ ।

चुरेसँगै तराईका क्षेत्रमा मनसुनी वायु सक्रिय रहेकाले त्यस क्षेत्रमा नेपालहुँदै भारत जाने ठूला नदी र स्थानीय नदीमा बहाव बढ्ने सङ्केत देखिएको बाढी पूर्वानुमान महाशाखाका जलविज्ञ सुनील पोखरेलले जानकारी दिनुभयो । त्यसैले सीमावर्ती क्षेत्रका नेपालका बस्ती डुबान र बाढीको चपेटाबाट बचाउन पूर्वतयारी आवश्यक भइसकेको पोखरेलले बताउनुभयो ।

प्रतिक्रिया