कोरोना संक्रमण रोकथाम नियन्त्रणका लागि सरकारले घोषणा गरेको लकडाउन पूर्ण रूपमा कार्यान्वयन गर्न प्रहरीले थप कडाइ सुरु गरेको छ ।
लकडाउन घोषणाको चौथो दिन शुक्रबार पनि अत्यावश्यकबाहेकका मानिसको आवतजावत भित्री तथा मुख्य सडकमा समेत नरोकिएपछि प्रहरीले लकडाउनलाई कडाइ गर्ने नीति अख्तियार गरेको जनाएको छ ।
सरकारले गत मंगलबारदेखि लागू हुने गरी एक हप्ताका लागि लकडाउनको घोषणा गरेसँगै प्रहरीले सुरुवाती दिनमा सडकमा निस्कनेहरूलाई सम्झाइबुझाई आवतजावत गर्न रोकेको थियो ।
तर, शुक्रबारदेखि प्रहरीले लकडाउनलाई कडा पार्न अत्यावश्यकबाहेक घरबाहिर निस्कनेलाई प्रक्राउ गरी कानुनी कारबाही सुरु गरेको छ ।
महानगरीय प्रहरी परिसर काठमाडौंका प्रवक्ता होबिन्द्र बोगटीले लकडाउन अवज्ञा गर्नेविरुद्ध कडा कारबाही सुरु गरेको जानकारी दिए ।
‘लकडाउन पूर्ण रूपमा कार्यान्वयनका लागि विशेष टोली नै परिचालन गरिएको छ, मुख्य सडक तथा भित्री गल्लीमा समेत बाहिर निस्के तत्काल पक्राउ गर्न आदेश दिइएको छ,’ प्रवक्ता बोगटीले भने ।
महानगरीय प्रहरी परिसर काठमाडौंले अत्यावश्यकबाहेक बाहिर निस्कनेलाई पक्राउ गर्न बन्दोबस्ती (गाडीमै हिरासत कक्ष रहेको) भ्यानसँगै सिआरभी, क्विक रेस्पोन्स भेहिकलसहितको प्रहरी टोली परिचालन गरिएको जनाएको छ ।
परिसरमातहतका १४ वटै वृत्तको टोली परिचालन गरिएको र थप मद्दतका लागि हेटक्वार्टरबाटसमेत प्रहरी टोली मगाइएको महानगरीय प्रहरी परिसर काठमाडाैंले जनाएको छ ।
परिसरले मातहतका क्षेत्रमा लकडाउन कडाइ साथ पालना गराउन तत्कालका लागि दुईवटा टोली परिचालन गरेको जनाएको छ ।
प्रहरी निरीक्षकको कमाण्डमा रहेको १५ जनाको प्रहरी टोली कलंकी, बालाजु, कालिमाटी, बसपार्क, सामाखुसी, बसुन्धरा क्षेत्रमा परिचालन गरिएको छ । त्यस्तै, अर्को १५ जनाको प्रहरी टोली चाबहिल, बौद्ध महाराजगन्ज, बानेश्वर क्षेत्रमा परिचालन गरिएको छ ।