काठमाडौँ । विश्व कीर्तिमानी नेपाली पर्वतारोही निर्मल पुर्जा ‘निम्सदाइ’ को पाकिस्तानस्थित ब्रोड पिक हिमालमा आएको हिमपहिरोमा परी निधन भएको छ। उहाँले स्थापना गरेको आरोहण कम्पनी ‘इलाइट एक्सपेड’ ले शनिबार सामाजिक सञ्जालमार्फत यस दुःखद घटनाको आधिकारिक पुष्टि गरेको हो।

बिहीबार ८,०४७ मिटर अग्लो ब्रोड पिकमा आएको भीषण हिमपहिरोमा पुर्जासहित उहाँका दुई भरपर्दा आरोहण सहयोगी तथा गाइड पुरबहादुर गुरुङ (युक्ता) र निमा शेर्पाले पनि ज्यान गुमाएका छन्।

इलाइट एक्सपेडले जारी गरेको विज्ञप्तिमा गहिरो दुःख व्यक्त गर्दै निर्मल पुर्जा मात्र नभई दुर्घटनामा ज्यान गुमाउने अन्य सहयात्रीप्रति पनि श्रद्धाञ्जली अर्पण गरेको छ।

शनिबार बिहान ड्रोनमार्फत गरिएको खोजीका क्रममा क्याम्प–१ नजिक पाँचवटा शव फेला परेपछि उद्धार टोली घटनास्थलतर्फ गएको थियो। यसअघि तीनवटा शव बरामद भइसकेका थिए। प्रतिकूल मौसम र जटिल भौगोलिक अवस्थाका बीच मिङ्मा ग्याल्जे शेर्पा (मिङ्मा जी) र सिरबाज खानको नेतृत्वमा रहेको भू–उद्धार टोलीले घटनास्थल पुगेर मृतकहरूको पहिचान गरेको जनाएको छ।

पूर्व ब्रिटिस गोर्खा सैनिकसमेत रहेका निर्मल पुर्जाले सन् २०१९ मा विश्वका ८ हजार मिटरभन्दा अग्ला सबै १४ हिमाल केवल ६ महिना ६ दिनमै आरोहण गरेर ऐतिहासिक विश्व कीर्तिमान कायम गरेका थिए। उनको यही साहसिक यात्रामा आधारित ‘14 Peaks: Nothing Is Impossible’ नामक नेटफ्लिक्स वृत्तचित्रले विश्वभर ठूलो लोकप्रियता हासिल गरेको थियो।

इलाइट एक्सपेडले यस शोकपूर्ण घडीमा परिवारको गोपनीयताको सम्मान गर्न सबैमा अनुरोध गर्दै दिवंगत पर्वतारोहीहरूप्रति हार्दिक श्रद्धाञ्जली व्यक्त गरेको छ।