काठमाडौं — टेरामक्स प्रविधिका उपकरण खरिदमा अनियमितता भएको भन्दै नेपाली कांग्रेसका सांसद तथा पूर्वमन्त्री मोहनबहादुर बस्नेतसहित १६ जना व्यक्ति र दुईवटा कम्पनीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ। आयोगले उनीहरूबाट जनही ३ अर्ब २१ करोड ८३ लाख ७७ हजार रुपैयाँभन्दा बढीको क्षतिपूर्तिको माग दाबी गर्दै अभियोगपत्र पेस गरेको हो।

मुद्दा दायर गरिएका व्यक्तिहरूमध्ये दुरसञ्चार प्राधिकरणका पूर्वअध्यक्ष दिगम्बर झा र पुरुषोत्तम खनाल, पूर्वसदस्यहरू धनराज ज्ञवाली र टिकाप्रसाद उप्रेती, निर्देशक विजयकुमार राय, सुरेन्द्रलाल हाडा र दिपेश आचार्य, उपनिर्देशकहरू रेवतीराम पन्थ, सुरेश बस्नेत, हरिण्यप्रसाद बस्ताकोटी, अच्युतानन्द मिश्र र सञ्जीव अधिकारी रहेका छन्।

यही प्रकरणमा मुछिएका पूर्व सञ्चारमन्त्रीद्वय ज्ञानेन्द्रबहादुर कार्की र गोकुल बाँस्कोटा तथा पूर्व मुख्यसचिव वैकुण्ठ अर्याललगायतविरुद्ध भने आयोगले मुद्दा नचलाउने निर्णय गरेको छ।

मुद्दामा समावेश दुई कम्पनीमध्ये एक परामर्शदाता कम्पनी भ्यानराइज सोलुसन्स् (SAL Offshore) हो, जसका सीईओ जमाल अनौती र अर्की कम्पनी कनेक्सन ट्रेड लिंक प्रा.लि.का अध्यक्ष दिलीपकुमार गुरुङ तथा निर्देशक तेजप्रसाद खरेल छन्। आयोगका अनुसार उनीहरूले राज्यको सम्पत्तिमा दुरुपयोग गरी सरकारलाई ठुलो नोक्सानी पुर्‍याएको उल्लेख छ।