काठमाडौं – गत चैत १५ गते राजावादी प्रदर्शनको क्रममा कोटेश्वरस्थित भाटभटेनी सुपरमार्केटमा भएको तोडफोड र लुटपाटका कारण ७० लाखभन्दा बढीको क्षति भएको छ। भाटभटेनीका सञ्चालक मीनबहादुर गुरुङका अनुसार लुटेराहरूले फलफूल, बियर, वाइन, राइसकुकर, फ्रिज लगायतका सामान लुटेर लगेका थिए।

घटनाका क्रममा भाटभटेनीका सुरक्षागार्ड दुलप्रसाद पराजुलीले एक्लै प्रतिकार गर्दै लुटेराहरूलाई लखेटेका थिए। पराजुलीको बहादुरी सामाजिक सञ्जालमा भाइरल बनेपछि भाटभटेनी सुपरमार्केटले उनलाई ५ लाख १ हजार १११ रुपैयाँ नगद, एउटा फुली तथा पाँच ग्रेड बढुवा गर्दै विशेष सम्मान प्रदान गरेको छ।

सम्मान कार्यक्रममा सम्भवतः पहिलोपटक सार्वजनिक रूपमा सम्बोधन गरेका पराजुलीले भाटभटेनीमा २२ वर्षदेखिको आफ्नो सेवाबारे अनुभव सुनाए। उनले जागिरबाट जग्गा खरिद, घर निर्माण, छोराको विवाह तथा गाडी खरिद गर्न सफल भएको बताउँदै आफूले गरेको प्रतिकारबारे संक्षिप्त धारणा राखे।

उनका अनुसार प्रदर्शनकारीहरू ढुंगामुढा गर्दै पसलभित्र प्रवेश गरेपछि आफूले टोलीसँग मिलेर लुटेराहरूलाई नियन्त्रण गर्ने प्रयास गरेका थिए। अन्य सुरक्षागार्ड भित्रबाट लखेटिरहेका बेला आफू बाहिरबाट प्रतिकार गरिरहेको पराजुलीले सुनाए।