काठमाडौं – प्रहरी प्रशासनले तीनकुने क्षेत्रमा राजावादी प्रदर्शनलाई नियन्त्रण गर्ने क्रममा साढे दुई सय राउन्ड गोली प्रहार गरेको स्वीकार गरेको छ। बुधबार आयोजित पत्रकार सम्मेलनमा नेपाल प्रहरीका केन्द्रीय प्रवक्ता डीआईजी दिनेश आचार्यले प्रदर्शन हिंसात्मक बनेपछि गोली चलाउनुपरेको स्पष्ट पारे।

प्रहरीका अनुसार प्रदर्शनका क्रममा व्यक्ति लक्षित ५८ राउन्ड गोली प्रहार गरिएकोमा २० जनालाई लागेको छ। तीमध्ये १८ पुरुष र २ महिला घाइते भएका छन्। प्रहरीको गोली लागेर कीर्तिपुरका सविन महर्जनको घटनास्थलमै मृत्यु भएको थियो, भने रेविका खत्रीसहित केही गम्भीर घाइतेको उपचार जारी रहेको छ।

डीआईजी आचार्यका अनुसार १९२ पटक हवाई फायर र ७४६ राउन्ड अश्रुग्यास प्रहार गरिएको थियो। प्रहरीले दिउँसो १२स्५० बजे पहिलो अश्रुग्यास र २स्५४ बजे पहिलो गोली प्रहार गरेको बताइएको छ।

प्रहरीले रेविका खत्री र उनका दाजु लगायतका केहीलाई झुक्किएर गोली लागेको भन्दै घाइतेहरूको अवस्थाबारे निरन्तर जानकारी लिइरहेको जनाएको छ।

यसैबीच, आन्दोलनको नेतृत्व गरिरहेका दुर्गा प्रसाईंको उक्साहटका कारण भिड उत्तेजित भएको प्रहरीको दाबी छ। निषेधित क्षेत्र तोड्दै संसद् भवनतर्फ जान खोजेपछि प्रहरी हस्तक्षेप गर्न बाध्य भएको बताइएको छ। प्रहरीले निषेधित क्षेत्रबाट हटाएपछि दुर्गा प्रसाईं र रवीन्द्र मिश्रले संसद् भवन, सिंहदरबार र विमानस्थल कब्जा गर्न आह्वान गरेपछि प्रदर्शनकारी तोडफोडमा उत्रिएको प्रहरीको निष्कर्ष छ।

हालसम्म राप्रपा उपाध्यक्ष रवीन्द्र मिश्र, महामन्त्री धवल शम्शेर राणा सहितका केही व्यक्तिलाई पक्राउ गरिएको छ, भने प्रसाईं अझै फरार रहेको र उनलाई खोज्न विशेष टोली परिचालित गरिएको प्रहरीले जनाएको छ।