काठमाडौं — चालु आर्थिक वर्ष २०८१/८२ सकिन अब मात्र २७ दिन बाँकी छ, तर सरकारले विकास निर्माणका लागि छुट्याएको बजेटको ठूलो हिस्सा अझै खर्च गर्न बाँकी छ। आर्थिक नियमावली अनुसार असार २५ गतेसम्म मात्रै भुक्तानी गर्न पाइने हुँदा, सरकारले अबको २२ दिनमा दैनिक ९ अर्ब ३९ करोड रुपैयाँ खर्च गर्नुपर्ने चुनौती छ।

अर्थमन्त्रालयको महालेखा नियन्त्रकको तथ्यांक अनुसार, चालु आर्थिक वर्षमा ३ खर्ब ५२ अर्ब रुपैयाँ पुँजीगत बजेट छुट्याइएको छ, तर हालसम्म मात्र १ खर्ब ४५ अर्ब (४१%) खर्च भएको छ। यसअनुसार, बाँकी २ खर्ब रुपैयाँ असार २५ गतेसम्म खर्च गर्नुपर्छ, जुन दैनिक ९ अर्बभन्दा बढीको दरले खर्च गर्नु बराबर हो।

विगतका वर्षहरूमा पनि सरकारले असार महिनामा नै ठूलो मात्रामा बजेट खर्च गरेको देखिन्छ। महालेखा नियन्त्रकको तथ्यांकले देखाए अनुसार, असारमा मात्र १८ देखि ४९ प्रतिशतसम्म खर्च हुने गरेको छ। यसको प्रमुख कारण भुक्तानी नभएका विलहरूको सेटलमेन्ट, फार्स्यौट प्रक्रिया तथा अन्तिम समयमा बजेट सक्ने प्रयास हो।

सरकारले हालसम्म १० खर्ब २३ अर्ब रुपैयाँ राजस्व संकलन गरेको छ, जुन लक्ष्यको ७२ प्रतिशत मात्र हो। यसैगरी, कुल बजेट १८ खर्ब ६० अर्ब रुपैयाँको ६९ प्रतिशत खर्च भए पनि वास्तविक प्रगति यसको ३० प्रतिशतभन्दा कम नै छ।