७८ लाख घुस ‘डिल’ प्रकरणमा निवर्तमान संघीय मामिला तथा सामान्य प्रशासन मन्त्री राजकुमार गुप्तामाथि अख्तियार दुरुपयोग अनुसन्धान आयोगले मुद्दा चलाउने प्रमाण पाएको छ । सार्वजनिक अडियोमा सुनिएको आवाज गुप्ताकै भएको भ्वाइस टेस्टले पुष्टि गरेपछि अख्तियारले उनलाई बयानका लागि बोलाएको हो ।

अडियोमा गुप्ताले तत्कालीन भूमि व्यवस्थामन्त्री बलराम अधिकारीले पैसा लिएर पनि काम नगरेको गुनासो गरेका छन् । उक्त अडियोमा कास्की मालपोतमा सरुवा, लिचिबारी जग्गा विवाद र भूमि आयोग अध्यक्ष नियुक्तिका विषयमा ७८ लाख रुपैयाँको ‘डिल’ भएको उल्लेख छ ।

बिचौलिया सुजन लामाले मन्त्री अधिकारीका छोरा र तत्कालीन भूमि सचिव अर्जुन पोखरेलसमेत संलग्न भएको बताएका अडियोसमेत सार्वजनिक भइसकेको छ । गुप्ताले राजीनामा दिए पनि घटनाको केन्द्रमा रहेका मन्त्री अधिकारी अझै पदमै रहेका छन् । यस प्रकरणमा नागरिक उन्मुक्ति पार्टीकी अध्यक्ष रञ्जिता श्रेष्ठसँग पनि आयोगले बयान लिएको छ ।