काठमाडौँ — बुटवलका सुजन कोइराला (३५) ले आफ्नी पूर्वपत्नी र दुई सन्तानको हत्या गरेका छन्। उनलाई २०७८ सालको संविधान दिवस (असोज ३ गते) को अवसरमा राष्ट्रपतिबाट आममाफी दिइएको थियो।

रूपन्देहीको बुटवल उपमहानगरपालिका–११ होराइजन चोकका स्थायी बासिन्दा सुजनले पूर्वपत्नी दीपा बस्याल (३०), छोरी स्नेहा (७) र हिमानी (४) लाई आफ्नै घरमा बोलाई धारिलो हतियार प्रयोग गरी हत्या गरेका हुन्। रूपन्देही प्रहरी प्रमुख प्रदीपबहादुर क्षेत्रीका अनुसार घटना बिहान ४ बजे घटेको हो।

सुजन र दीपाको विवाह २०६९ सालमा भएको थियो। विवाह भएको सोही वर्ष उनले आफ्नै दाजु सुदीप कोइरालाको हत्या गरेका थिए। सो घटनापछि जेल जीवन सुरु भयो र श्रीमान्–श्रीमतीबीचको सम्बन्ध बिग्रियो। अन्ततः २०७२ सालमा उनीहरूले सम्बन्धविच्छेद गरे।

सम्बन्धविच्छेदपछि दीपा बस्यालले पूर्वी नवलपरासीका शंकर ढकालसँग विवाह गरिन्। दुई छोरीहरू उनीहरुकै संतान हुन्। हाल शंकर वैदेशिक रोजगारीका लागि दुबईमा छन् भने दीपा पाल्पा, तानसेनमा स्वास्थ्यकर्मीका रूपमा कार्यरत थिइन्।

जेलबाट रिहा भएपछि सुजनले सामाजिक सञ्जालमार्फत दीपासँग पुनः सम्पर्क गरेका थिए। त्यसयता उनीहरूबीच भेटघाट हुने क्रम बढेको थियो। आफन्तको विवाहमा सहभागी हुन आएकी दीपालाई सुजनले आफ्नै घर बोलाई हत्या गरेका हुन्।

सुजनले जेल जीवनमा विभिन्न सीप सिकेका थिए— मुढा, नाङ्लो, डोरी जस्ता सामग्री बनाउने। रिहा भएपछि उनले यही व्यवसाय थालनी गरेका थिए। छिमेकीहरूका अनुसार उनी व्यवहारमा नरम र मिलनसार देखिन्थे।

तर, यो घटनाले आममाफीको प्रक्रिया र त्यसको दुरुपयोगबारे गम्भीर प्रश्न उठाएको छ।

संविधानको धारा २७६ अनुसार राष्ट्रपतिले अदालत वा निकायबाट दिइएको सजायलाई माफी, कम वा परिवर्तन गर्न सक्ने व्यवस्था छ। फौजदारी कार्यविधि संहिता २०७४ को धारा १५९ मा सजाय माफीका प्रावधानहरू स्पष्ट छन्। तर, यस्तो माफी पीडितको सहमतिमा मात्र दिनुपर्ने भनिएको छ। व्यवहारमा भने राजनीतिक दवाब वा पहुँचको आधारमा पनि माफी दिइएको आलोचना भइरहेको छ।

सामाजिक सञ्जालमा यो घटनापछि आममाफी दिन संलग्न निकाय तथा सरकारको कडा आलोचना भइरहेको छ। "माफी दिइने हो भने पीडकले फेरि हत्या गर्छन्" भन्ने आवाजहरू बलियो रूपमा उठेका छन्। यसबारे कानुनी पुनरावलोकनको मागसमेत चुलिएको छ।