काठमाडौं–नेपाल उद्योग वाणिज्य महासंघका अध्यक्ष तथा निजी क्षेत्रबाट प्रवद्र्धित पहिलो पूनर्बीमा कम्पनी हिमालयन रि इन्स्योरेन्सका अध्यक्ष शेखर गोल्छाले रि इन्स्योरेन्सको तीन अर्ब रुपैयाँको आईपीओ निष्कासन गर्ने बताएका छन् । कम्पनीको शुक्रबार सम्पन्न प्रथम साधारण सभाले थप ३ अर्ब रुपैयाँ पूँजी जुटाउनको लागी सर्वसाधारणमा शेयर जारी गर्ने निर्णय गरेका अध्यक्ष गोल्छाले बताए । ‘तीन अर्बको आईपीओ निष्कासन गर्ने प्रस्ताव पारित गरेका छौं,’ गोल्छाले भने ।

हिमालयन रिको संस्थापकहरुले ७ अर्ब रुपैयाँ पूँजी लगानी गरिसकेका छन् । थप तीन अर्ब आईपीओ निष्कासन गरेर जुटाउने योजना छ । चुक्ता पूँजी १० अर्ब कायम गर्ने निर्णयसँगै साधारण शेयर जारी गर्ने निर्णय प्रस्ताव समेत पारित गरेको हो ।

प्रथम वार्षिक प्रतिवेदनका अनुसार कम्पनीले संचालनको छोटो अवधिमा झण्डै १ करोड रुपैयाँ मुनाफा आर्जन गर्न सफल भएको छ । प्रथम साधारण सभाबाट पारित आ.व. ७७÷७८ को वार्षिक प्रतिवेदन अनुसार हिमालयन रिले ९४ लाख २६ हजार रुपैयाँ खुद नाफा गरेको छ । २०७८ असार ३१ बाट मात्र औपचारिकरुपमा पूनर्बीमा सेवा शुरु गरेको कम्पनीले गत आ.व.मा लगानी, कर्जा तथा अन्य शीर्षकबाट कूल २ करोड ३७ लाख ६२ हजार रुपैयाँ आम्दानी गरेको छ ।

गत आर्थिक वर्षमा कम्पनीको व्यवस्थापन तथा अन्य खर्च शीर्षकमा १६ लाख ८७ हजार रुपैयाँ खर्च भएको छ । २१ अर्ब अधिकृत, १० अर्ब जारी र ७ अर्ब रुपैयाँ चुक्ता पूँजी रहेको यस कम्पनीको बीमाकोषमा गत असार मसान्तसम्ममा ४८ लाख १९ हजार रुपैयाँ जम्मा भएको छ ।