चालु आर्थिक वर्ष २०८२/८३ को साउन महिनामा जीवन बीमा कम्पनीहरूले साढे १९ अर्ब रुपैयाँभन्दा बढीको व्यापार गरेका छन् । नेपाल बीमा प्राधिकरणले शुक्रबार सार्वजनिक गरेको तथ्याङ्कअनुसार साउन महिनामा बीमा कम्पनीहरूले १९ अर्ब ६५ करोड ३३ लाख ५५ हजार रुपैयाँ बीमा शुल्क संकलन गरेका छन् ।

यो अवधिमा कम्पनीहरूले २ लाख ८४ हजार १७६ वटा बीमालेख जारी गरेका छन् । जसअन्तर्गत नयाँ व्यवसाय (प्रथम बीमा शुल्क) ३ अर्ब २७ करोड २४ लाख रुपैयाँ र नविकरण बीमा शुल्क १६ अर्ब ३८ करोड ८ लाख रुपैयाँ संकलन भएको छ ।

व्यापारमा नेपाल लाइफ अग्रस्थानमा रह्यो । कम्पनीले मात्र साउनमा ६ अर्ब १९ करोड २५ लाख रुपैयाँ बीमा शुल्क संकलन गरेको छ । यस अवधिमा कम्पनीले ७५ हजार ९५३ वटा बीमालेख बिक्री गरेको छ ।

त्यसपछि नेशनल लाइफ दोस्रो स्थानमा रह्यो जसले २ अर्ब ४१ करोड ४५ लाख रुपैयाँ संकलन गर्‍यो । तेस्रो स्थानमा लाइफ इन्स्योरेन्स कर्पोरेशन (एलआइसी) नेपाल २ अर्ब ३ करोड ९९ लाख रुपैयाँ संकलनसहित रह्यो ।

यस्तै, हिमालयन लाइफ चौथो स्थानमा २ अर्ब २ करोड ८१ लाख रुपैयाँ बराबरको व्यापार गर्न सफल रह्यो । अन्य कम्पनीहरूमध्ये सूर्यज्योति लाइफ, एशियन लाइफ, सिटिजन, सानिमा रिलायन्स, आइएमई लाइफ, प्रभु महालक्ष्मी, रिलायबल नेपाल, मेट लाइफ, राष्ट्रिय जीवन र सन नेपाल लाइफले पनि उल्लेख्य कारोबार गरेका छन् ।