काठमाडौं । हाल जापानमा बसोबास गरिरहेकी समाजसेवी कल्पना क्षेत्रीले जापानी परिवारमा बुहारी भएर गएकी भए पनि छोरीजस्तै माया पाएको अनुभव साझा गरेकी छन्। नेपालबाट जापानमा स्थायी वा अस्थायी रूपमा बसोबास गर्ने नेपालीहरूको संख्या करिब ३ लाख पुगेको छ। तीमध्ये कोही व्यवसायका लागि, कोही कामको सिलसिलामा, र कोही अध्ययनका लागि जापान पुगेका छन् भने केही नेपाली महिलाहरू जापानी नागरिकसँग विवाह गरेर त्यहाँ बसोबास गरिरहेका छन्। यस्ता विवाहको आधिकारिक तथ्याङ्क नभए पनि हालसम्म करिब २ सयभन्दा बढी नेपाली चेलीहरू जापानीसँग विवाह गरेर जीवनयापन गरिरहेका अनुमान छ।

कल्पना क्षेत्री पनि यस्तै एक उदाहरण हुन्, जसले जापानी नागरिकसँग विवाह गरेकी छन्। गोरखा घर भएकी कल्पना आफू एक ठूलो दुर्घटनाबाट बाँचेपछि जीवनलाई समाज सेवामा समर्पित गर्ने निर्णयमा पुगेकी हुन्। प्रचारभन्दा पनि मौन सेवा गर्न रुचाउने कल्पनाले हालसम्म धेरैलाई सहयोग गरेकी छन्, यद्यपि त्यसको प्रचारप्रसार गर्ने चाहना छैन।

जापानी नागरिकसँग विवाह कसरी भयो?
कल्पनाका अनुसार, उनका श्रीमान नेपाली समुदायमा नजिक थिए र नेपालीहरूको बोलीचाली तथा व्यवहार मन परेकाले नेपाली जीवनसाथी चाहिएको बताएपछि विवाहको प्रस्ताव आएको थियो। अन्ततः दुवै परिवारको सहमतिमा नेपाली र जापानी परम्परा अनुसार विवाह सम्पन्न भयो। कल्पना भन्छिन्, "म ठूलो बिरामी परेपछि आजको परिवारले दिएको साथ र माया मेरो जीवनमा महत्वपूर्ण turning point बन्यो।"

भाषाले बनायो सुरुवात कठिन
नेपालबाट पहिलो पटक जापान जाँदा भाषा नबुझ्दा उनले निकै कठिनाइ भोग्नु परेको बताउँछिन्। "मैले बोल्दा उहाँहरू बुझ्दैनथे, उहाँहरूले बोल्दा म बुझ्दिनथे," कल्पना सम्झिन्छिन्, "तर मलाई जापानमा बुहारी नभई छोरीजस्तै माया पाए।"

उनी बताउँछिन्, आफू थला पर्दा सासुले कामबाट विदा लिएर सेवा गरेकी थिइन्। हाल उनी आफ्नो परिवारसँग जापानमा फूलको व्यापार र स्थानीय स्तरमा तरकारी खेती गरिरहेकी छन्। जापानमा बसोबास गर्ने धेरै नेपालीहरूले कल्पनाबाट चामल, फलफूल र तरकारी उपहारस्वरूप पठाउने गरेकी छन ।

सामाजिक सेवामा समर्पण
कल्पना भन्छिन्, "दुर्घटनाले जीवनको मूल्य बुझाइदियो। कसैको पीडा देख्दा चुप बस्न सक्दिन। सहयोग गर्दा मनमा जुन शान्ति र आनन्द मिल्छ, त्यो अरू काममा मिल्दैन।"

सामाजिक सेवासँगै गीत–सङ्गीतमा पनि रुचि राख्ने कल्पनाले पछिल्लो समय सार्वजनिक गरेको 'आलाराम' गीतले पनि राम्रो चर्चा बटुलेको थियो। भाषाको कठिनाइका बाबजुद परिवारको साथले सबै चुनौती पार गरेकी कल्पनाले अहिले जापानी भाषा राम्रोसँग सिकेर सवारी साधन चलाउने लाइसेन्स पनि प्राप्त गरिसकेकी छन्।

उनकी एक छोरी पनि छन्, र परिवारमा सबै जना एक–अर्काको भाषा बोल्ने प्रयास गरिरहेका छन्। दुवै देशका परिवारले उनको वैवाहिक सम्बन्धलाई खुसीसाथ स्वीकार गरेका छन्।

कल्पनाको प्रतिबद्धता छ – बाँकी जीवन समाज सेवामा समर्पित गर्ने।
उनको भनाइ छ, "जापान सम्भावनायुक्त देश हो तर भाषा नआएमा निकै कठिन हुन्छ। सबैले मेरो जस्तो परिवार पाउँदैनन्, त्यसैले जापानीसँग विवाह गर्नु सजिलो पनि छैन। तर मेरो अनुभवले देखाउँछ कि कठिन बाटो तय गरे पनि सही साथ पाएमा सफल जीवन सम्भव छ।"