चैत १५ मा भएको राजावादी प्रदर्शनका क्रममा तोडफोड र आगजनीबाट करिब ४७ करोड रुपैयाँ बराबरको क्षति पुगेको छ । सरकारी तथा निजी सवारीसाधन, भवन र अन्य भौतिक संरचनामा क्षति पुगेको भन्दै प्रहरीमा ४६ करोड ९० लाख ८५ हजार ३४० रुपैयाँ बराबरको क्षतिपूर्ति मागदाबी परेको छ ।

गत सातासम्म ४ करोड ५९ लाख ६२ हजार ७२१ रुपैयाँ बराबरको मात्रै बिमा दाबी परेका छन् भने बाँकी करिब ४२ करोड रुपैयाँभन्दा बढी क्षति बिमा नभएकाले कसले भर्नु भन्ने अन्योल कायम छ । प्रहरीले दिएको प्रारम्भिक विवरण अनुसार, ५६ घर, संस्था र कार्यालयमा तोडफोड तथा आगजनी हुँदा ३९ करोड ९२ लाख ३६ हजार ६७६ रुपैयाँ बराबरको क्षति पुगेको छ । क्षति पुगेका सवारीसाधनको संख्या ६९ छ, जसमा नेपाल प्रहरी, अन्य सरकारी निकाय तथा निजी सवारीसमेत छन् । सवारीमा मात्र ६ करोड ८७ लाख ७७ हजार ६५० रुपैयाँ बराबरको क्षति भएको छ भने १० लाख ७१ हजार रुपैयाँ बराबरका आठ वटा सीसीटीभीसमेत नष्ट भएका छन् ।

तीनकुनेस्थित साइन टेक नेपाल प्रालिका सञ्चालक रवीन्द्र ओझाले ३ करोड ७ लाख ९५ हजार रुपैयाँ बराबरको क्षति पुगेको जानकारी दिएका छन् । कोटेश्वरस्थित शान्ति अटो प्रालिले बिक्रीका लागि राखेका ८ गाडीमा पनि प्रदर्शनकारीले तोडफोड गरेको छ । जडीबुटी उत्पादन तथा प्रशोधन कम्पनी लिमिटेडमा २८ करोड रुपैयाँ बराबरको क्षति पुगेको प्रारम्भिक अनुमान गरिएको छ ।

काठमाडौंका प्रमुख जिल्ला अधिकारी ऋषिराम तिवारीका अनुसार, बिमा गरिएका सम्पत्तिका लागि बिमा कम्पनीबाट क्षतिपूर्ति पाइन्छ, तर बिमा नभएका हकमा सरकारले विशेष निर्णयका आधारमा राहत दिन सक्छ । यद्यपि सामान्यतया आरोपितबाटै क्षतिपूर्ति भराउने कानुनी प्रक्रिया अघि बढाइने उनले बताए । हाल प्रहरी अनुसन्धान प्रारम्भिक चरणमा रहेकोले पीडितले क्षतिपूर्ति कहिले र कति पाउँछन् भन्ने टुंगो लागेको छैन ।

नेपालमा सवारी तथा सम्पत्तिको स्वस्फूर्त बिमा गर्ने चलन न्यून रहेको हुँदा धेरैले बिमा दाबी गर्न नसकेको देखिन्छ । वैशाख ३ सम्ममा नेपाल बिमा प्राधिकरणमा ५० वटा दाबी परेका छन्, जसमा २१ वटा घर तथा सम्पत्तिका, २२ मोटर बिमाका, ३ इन्जिनियरिङ जोखिम र अन्य ४ विविध बिमाका छन् । परेका दाबीमध्ये करिब ३३ लाख ३५ हजार रुपैयाँ मात्रै भुक्तानी भइसकेको छ ।

तीनकुनेका नयनबहादुर पण्डित क्षेत्रीले आफ्नो चार तले घरमा भएको क्षतिको क्षतिपूर्ति बिमाबाट पाएको बताए । उनले गरेको १ करोडको बिमाबाट ४० प्रतिशत ह्रासकट गरी ५ लाख ६५ हजार रुपैयाँ भुक्तानी पाएको उल्लेख गरेका छन् ।

प्रदर्शनका क्रममा दुई व्यक्तिको मृत्यु भएपछि सरकारले मृतकका परिवारलाई जनही १० लाख रुपैयाँ राहत दिन निर्णय गरेको छ । राहत वितरण प्रक्रियामा रहेको प्रमुख जिल्ला अधिकारी तिवारीले जानकारी दिए ।

राजावादी प्रदर्शनको क्षतिको विवरण (चैत १५)