काठमाडौँ–सिडिएस एण्ड क्लियरिङ्ग लिमिटेडले प्राविधिक कारण देखाउँदै भोली बुधबार (माघ २८ गते) निष्कासन गर्ने तयारी भैरहेको एक लघुवित्त कम्पनीको प्राथमिक शेयर (आईपीओ)को मिति पछि सारेको छ । महिला लघुवित्त वित्तीय संस्थाले माघ २८ गतेदेखि आईपीओ निष्काशन खुला गर्ने निर्णय गरेको थियो ।

क्लियरिङ्ग लिमिटेडले प्राविधिक कारण देखाउँदै अनुरोध गरेपछि मिति सारेको हो । बिक्री प्रबन्धक नेपाल एसबिआई मर्चेण्ट बैंकिङका अनुसार महिला लघुवित्तको आईपीओ अब माघ ३० गतेदेखि निष्काशन खुला हुनेछ । आईपीओमा छिटोमा फागुन ४ र ढिलोमा फागुन १४ गतेसम्म आवेदन दिन सकिने छ । कम्पनीले प्रतिसेयर १०० रुपियाँ अंकित मूल्यको ४ लाख कित्ता सेयर (४ करोड रुपैयाँको) विक्री गर्न लागेको हो । यो आईपीओ खरिदका लागि न्यूनतम १० कित्तादेखि अधिकतम एक हजार कित्तासम्म आवेदन दिन सकिनेछ ।

संस्थाको जारी पूँजी १० करोडको ४० प्रतिशतले हुन आउने ४ करोड रकम बराबरको ४ लाख कित्ता आईपीओ मध्ये ०.५ प्रतिशत अर्थात ५ हजार कित्ता कर्मचारीहरु तथा ५ प्रतिशत अर्थात २० हजार कित्ता सेयर सामूहिक लगानी कोषका लागि सुरक्षित गरी बाँकी रहने ३ लाख ७५ हजार कित्ता साधारण शेयरको सार्वजनिक निष्काशन गर्न लागेको हो ।