काठमाडौं– प्रधानमन्त्री केपी शर्मा ओलीले संविधान कुल्चेर असंवैधानिक कदम चाल्दा पनि तत्कालिन संविधान सभाका अध्यक्ष सुवास नेवाङ चुप लागेकोमा नेपाली कांग्रेसका नेता गगन थापाले आश्चार्य व्यक्त गरेका छन । कांग्रेस नेता थापाले तत्कालीन संविधानसभा अध्यक्ष रहेका नेपाल कम्युनिष्ट पार्टी नेकपाका नेता सुवास नेम्वाङको निरिहताप्रति दया लागेको टिप्पणी गरेका छन ।

प्रतिनिधि सभा विघटन गर्दा असंवैधानिक हो भन्नुपर्नेमा नेम्वाङ लुकेर बसेको थापाको आरोप छ । ‘प्रतिनिधिसभा विघटनको संवैधानिक प्रश्नमा आजबाट सर्वोच्च अदालतमा बहस सुरू हुँदैछ । म यतिवेला संविधानसभा अध्यक्ष सुवासचन्द्र नेम्वाङलाई सम्झिरहेको छु, जसलाई संविधानका अक्षर त्यसको स्पन्दन अनि त्यससंग जोडिएका सन्दर्भ र त्यस समयका सभासमिति अनि कोठादेखि चोटासम्मका बहसको बारेमा थाहा छ,’ थापाले बुधबार बिहान ट्वीट गर्दै लेखेका छन ।

यस्तो संकटका बेला तत्कालीन संविधान सभा अध्यक्ष नेम्वाङ अदालतमा उभिएर प्रधानमन्त्री ओलीको कदम असंवैधानिक भन्दै जमेर बहस गर्नुपर्ने थापाको धारणा छ ।
‘मलाई लागेको थियो यो संकटमा मेरो अध्यक्षले अदालतमै उभिएर श्रीमान् प्रधानमन्त्री ओलीले गर्नुभएको प्रतिनिधिसभा विघटन असंवैधानिक हो । मेरो नेतृत्वमा बनाएको संविधानमा यस्तो प्रावधान लेखिएकै छैन र विधायिकी मनसाय यस्तो हुँदै होइन भनेर सन्दर्भसहित जमेर बहस गर्नु हुनेछ,’ थापाले ट्वीटमा लेखेका छन्, ‘अपसोच उहाँ त कसैले केही सोध्लान् की भनेर लुकेर बस्नुभएको छ। प्रश्नबाट भाग्नुभएको छ । आफैँले बनाएको संविधानमा ’’कू’’ हुँदै गर्दा त्यसविरुद्ध चुइँक्क बोल्न नसक्ने मेरो अध्यक्षको यो तहको ’निरिहता’ देख्दा दया लागेको छ।’ नेम्वाङ प्रधानमन्त्री ओली निकट भएकाले बोलेका छैनन् ।

गगन थापाले प्रधानमन्त्रीको कदल असंवैधानिक भएकाले संसद पुर्नस्थापना हुनुपर्ने माग गर्दै आएका छन् ।