काठमाडौं– डेढ दर्जन बैंक तथा वित्तीय संस्थासँग मर्जर बनेको मुलुककै सबैभन्दा धेरै पूँजी भएको वाणिज्य बैंक ग्लोबल आइएमई बैंकले शनिवार (आज) १४ औं वार्षिकोत्सव मनाउँदैछ । बैंकको प्राथमिक पूँजी २७ अर्ब रुपैयाँ पुगेको छ ।
बैंकले १४ वर्षको १७ वटा बैंक तथा वित्तीय संस्थालाई मर्ज गरेको छ । ग्लोबलले शनिवार बार्षिक उत्सवको अवसरमा प्रकाशित विज्ञप्ति अनुसार बैंकले दुई सय ४९ अर्ब रुपैयाँ निक्षेप, दुई सय ११ अर्ब रुपैयाँ कर्जा लगानी गरेको छ । बैंकले पाँच सय ५७ सेवा केन्द्रबाट सेवा दिएको छ भने दुई सय ४० एटीमए रहेका छन् । बैंकमा तीन हजार जना जनशक्ति रहेको छ ।
ग्लोबल आइएमई बैंक गत वर्ष मात्र ‘क’ बर्गको जनता बैंकसँग मर्ज भएर एकीककृत कारोबार सुरु गरेको थियो । ग्लोबल आइएमईले कुल १७ वटा बैंक तथा वित्तीय संस्था मर्ज गरेको छ ।
बैंकले आर्थिक वर्ष २०७६÷०७७ को नाफाबाट सेयरधनीहरुलाई १६ प्रतिशत लाभांश दिने भएको छ । १४ प्रतिशत बोनस सेयर र करसहित २ प्रतिशत नगद लाभांश दिने निर्णय गरेको हो । बैंकले गत वर्ष १२.७५ प्रतिशत बोनस र करसहित १२.७५ प्रतिशत नगद लाभांश दिएको थियो । यसबाहेक ग्लोबल आईएमई बैंकले विदेशमा पनि तीन वटा प्रतिनिधि कार्यालयमाफर्त सेवा प्रदान गर्दै आइरहेको छ । ग्लोबल आइएमई बैकका अध्यक्ष चन्द प्रसाद ढकाल हुन् । व्यावसायिक क्षेत्रमा सफल ढकालको नेतृत्वमा सुरु भएको ग्लोबल आइएमई बैंक छोटो समयमा अब्बल बैंकको रुपमा स्थापित भएको छ ।