काठमाडौं–विवादित छवी भएका व्यक्तिलाई लगानी बोर्डको प्रमुख कार्यकारी अधिकृत नियुक्त गरेको भन्दै आलोचना भैरहेका बेला नवनियुक्त कार्यकारी अधिकृत सुशील भट्टले कोभिड प्रकोपकैै बीच काम देखाउन सुरु गरेका छन् । कोभिडको कारण नयाँ परियोजना नआइरहेका बेला लगानी बोर्डले साढे ३८ अर्ब रुपैयाँका परियोजना स्वीकृत भएको छ ।

भट्ट प्रमुख कार्यकारी अधिकृत बनेपछि सक्रियता देखाउँदै पाइपलाइनमा रहेका विद्युत परियोजना अघि बढाउन स्वीकृत गराएका हुन् ।
प्रधानमन्त्री केपी शर्मा ओलीको अध्यक्षतामा बसेको लगानी बोर्डको बैठकले स्वीकृति दिएको हो । स्वीकृत भएका सबै आयोजना जलविद्युत् परियोजना रहेका छन् ।

लगानी बोर्डका प्रमुख कार्यकारी अकिृत भट्टका अनुसार सार्वजनिक निजी साझेदारी (पीपीपी) अवधारणामा कार्यान्वयन हुन लागेको ७७.५ मेगावाट क्षमताको घुन्साखोला जलविद्युत् परियोजना रहेको छ । उक्त परियोजनाको १७ अर्ब ६२ करोड ४० लाख रुपैँया लगानी स्वीकृत गरिएको छ ।

त्यसैगरी, ५७ मेगावाटको हिमचुली दोर्दी जलविद्युत् परियोजनाका लागि १० अर्ब ६१ करोड ९१ लाख रुपैँया र ६५ मेगावाट क्षमताको दुधखोला जलविद्युत् परियोजनाका लागि १० अर्ब ४३ करोड ६० लाख रुपैँया लगानी स्वीकृत भएको लगानी बोर्डले जनाएको छ । बोर्डको अध्यक्ष प्रधानमन्त्री हुने व्यवस्था रहेको छ ।

लगानीकर्तालाई आकर्षित गर्ने गरी परियोजना निर्माण गर्न प्रधानमन्त्री ओलीले निर्देशन दिएका थिए । बोर्डका कामका बारेमा प्रमुख कार्यकारी अधिकृत भट्टले जानकारी गराएका थिए ।