साताको तेस्रो कारोबार दिन मंगलबार लगानीकर्ताहरुको आकर्षण सस्ता हाइड्रोपावर कम्पनीहरुमा नै देखिएको छ। शेयर बजार मापक नेप्से सूचक ७.२१ अंकले घट्दा पनि १० वटा भन्दा धेरै हाइड्रोपावरको शेयरमूल्यमा सकारात्मक सर्किट लागेको छ।

यसदिन हाइड्रोपावर कम्पनीहरुको शेयरमा खरिद चाप बढ्दा हाइड्रोपावर उपसमूहको सूचक २.१९ प्रतिशतले बढेको छ। कारोबारमा आएका १२ वटा उपसमूहमध्ये ९ वटा उपसमूहको सूचक नकारात्मक देखिएको छ भने हाइड्रोपावर, उत्पादनमूलक र म्युचुअल फण्ड उपसमूहका सूचक सकारात्मक छन्।

यस दिन १९२ वटा कम्पनीको ७२ लाख ८० हजार कित्ता शेयर १ अर्ब ८२ करोड रुपैयाँमा खरिद बिक्री भएको छ। त्यस्तै नेप्से सूचक ७.२१ अंकले घटेर १५५३.६२ अंकमा झरेको छ।

११ हाइड्रोको शेयरमूल्य ९ प्रतिशतभन्दा धेरैले बढ्यो
मंगलबार ११ वटा हाइड्रोपावर कम्पनीको शेयरमूल्य ९ प्रतिशतभन्दा धेरैले बढेको छ।

यस दिन जोशी हाइड्रोपावरको शेयरमूल्य सबैभन्दा धेरै १० प्रतिशतले बढेको छ भने हिमालयन उर्जा, आँखुखोला, घलेम्दी, युनाइटेड मोदी, युनिभर्सल पावर, नेपाल फाइनान्स, पञ्चकन्या माई हाइड्रोपावर, युनियन हाइड्रोपावर, छ्यांदी हाइड्रोपावर, हिमाल दोलखा हाइड्रोपावर, र दिब्यश्वरी हाइड्रोपावरको शेयरमूल्य ९ प्रतिशतभन्दा धेरैले बढेको छ।

त्यस्तै, सपोर्ट माइक्रोफाइनान्सको शेयरमूल्य सबैभन्दा धेरै ३.६२ प्रतिशतले घटेको छ भने रिलायन्स फाइनान्सको ३.५५ प्रतिशत, श्री इन्भेष्टमेन्ट फाइनान्सको ३.३० प्रतिशत, साल्ट ट्रेडिङको २.७४ प्रतिशत र इन्फिनिटी लघुवित्तको २.४० प्रतिशतले घटेको छ।

मंगलबार अरुण कावेली हाइड्रोपावरको सबैभन्दा धेरै १७ करोड ४१ लाख रुपैयाँ बराबरको शेयर कारोबार भएको छ भने हिमाल दोलखाको १० करोड ६२ लाख, नेपाल पूनर्बीमा कम्पनीको ७ करोड ८१ लख, अरुण भ्याली हाइड्रोपावरको ७ करोड ७ लाख र हाइड्रो इलेक्ट्रिसिटी इन्भेष्टमेन्ट एण्ड डेभलपमेन्ट कम्पनीको ४ करोड ५६ लाख रुपैयाँ बराबरको शेयर कारोबार भएको छ।