काठमाडौँ । देशभर हाल मनसुनी वायुको प्रभाव रहेको छ। मौसम पूर्वानुमान महाशाखाका अनुसार, मनसुनको न्यून चापीय रेखा सरदर स्थानभन्दा दक्षिणतिर अवस्थित छ, जसको कारण देशका पहाडी भूभाग, कर्णाली, र सुदूरपश्चिम प्रदेशमा साधारणतया बदली देखिएको छ। बाँकी क्षेत्रमा आंशिक बदली रहेको छ। कोशी, बागमती, लुम्बिनी, र सुदूरपश्चिम प्रदेशका केही स्थानमा हल्का देखि मध्यम वर्षा भइरहेको छ।

आज दिउँसो सुदूरपश्चिम प्रदेशमा पूर्णतया बदली रहनेछ भने बाँकी प्रदेशहरूमा आंशिकदेखि साधारण बदली रहनुका साथै केही स्थानमा चट्याङ्गसहित हल्कादेखि मध्यम वर्षाको सम्भावना छ। कोशी, बागमती, लुम्बिनी, र सुदूरपश्चिम प्रदेशका एक-दुई स्थानमा हावाहुरीसहित भारी वर्षा हुने सम्भावना रहेको छ।

राति पनि सुदूरपश्चिम प्रदेशमा पूर्णतया बदली रहनुका साथै, गण्डकी, लुम्बिनी, र सुदूरपश्चिम प्रदेशमा भारी देखि अति भारी वर्षाको सम्भावना रहेको छ। महाशाखाले सम्भावित बाढी, पहिरो, र भूक्षयबाट बच्न सतर्क रहन आग्रह गरेको छ।