देशभर मनसुनी वायुको प्रभाव जारी छ। जल तथा मौसम विज्ञान विभागका अनुसार, मनसुनको न्यून चापीय रेखा औसत स्थानको दक्षिणतिर रहेको छ।

हाल, कोशी प्रदेश लगायत पहाडी क्षेत्रहरूमा आंशिकदेखि सामान्य बदली छ भने बाँकी भूभागमा आंशिक बदलीदेखि सफा मौसम छ। कोशी प्रदेशका केही स्थानहरूमा हल्का वर्षा भइरहेको छ।

शनिबार दिउँसो देशभर आंशिकदेखि साधारण बदली रहनेछ। कोशी, बागमती, गण्डकी, र लुम्बिनी प्रदेशका केही स्थानहरूमा मेघ गर्जनसहित हल्कादेखि मध्यम वर्षा हुनसक्छ। कोशी र गण्डकी प्रदेशका केही स्थानमा भारी वर्षाको सम्भावना छ।

शनिबार राति पनि देशभर आंशिकदेखि साधारण बदली रहनेछ। कोशी, मधेस, बागमती, गण्डकी, र लुम्बिनी प्रदेशका केही स्थानमा मेघ गर्जनसहित हल्कादेखि मध्यम वर्षाको सम्भावना रहेको छ। कोशी र बागमती प्रदेशका केही स्थानमा भारी र अत्यधिक भारी वर्षाको पनि सम्भावना छ।

आगामी २४ घण्टामा कोशी, मधेस, बागमती, गण्डकी, र लुम्बिनी प्रदेशका केही स्थानहरूमा हल्कादेखि मध्यम वर्षा हुने अनुमान छ। कोशी र बागमती प्रदेशका केही स्थानमा भारी र अत्यधिक भारी वर्षा हुने सम्भावना रहेकाले बाढी, पहिरो, र भूक्षयजस्ता प्रकोपको जोखिमबाट जोगिन विभागले सतर्कता अपनाउन आग्रह गरेको छ।