काठमाण्डौ । तीज गीतहरूको चर्चा र आलोचना भइरहेका बेला चर्चित सर्जक महेन्द्र रेग्मीले आफ्नो नयाँ मौलिक तीज गीत 'छोरीलाई तीज' सार्वजनिक गरेका छन्।

हाल तीजका गीतहरू युट्युब लगायतका माध्यमहरूमा अग्रस्थानमा रहेका छन्, तर कतिपयले तीज गीतहरूले आफ्नो मूल्य र मान्यता गुमाएको भन्दै आलोचना गरिरहेका छन्। यसैबीच, महेन्द्र रेग्मीले मौलिकता झल्काउने गीत 'छोरीलाई तीज' प्रस्तुत गरेका छन्, जसमा चेलिको पीडा र भावनालाई समेटिएको छ।

गीतको लय र शब्द महेन्द्र रेग्मीले तयार पारेका हुन् भने देवी घर्ति र महेन्द्र रेग्मीले गीतमा स्वर दिएका छन्। संगीत संयोजन याम थापाले गरेका छन् भने भिडियोको निर्देशन विष्णु भट्टराईले गरेका छन्। भिडियोमा विमल न्यौपाने, भरत क्षेत्री, महेन्द्र रेग्मी लगायतका कलाकारहरूको अभिनय रहेको छ।

गीतको अडियो र भिडियो निर्माणमा मौलिकता कायम राख्ने प्रयास गरिएको छ, जसले तीजको वास्तविक भावनालाई व्यक्त गरेको छ।