काठमाडौं–पछिल्लो समय हाइड्रोपावर कम्पनीहरुमा लगानीकर्ताको आकर्षण बढिरहेका बेला विभिन्न जलविद्युत् कम्पनीले पनि सर्वसाधारणका लागि प्राथमिक सेयर (आईपीओ) जारी गर्ने प्रक्रियामा रहेका छन् । आईपीओ निष्कासनका लागि करिब एक दर्जन जलविद्युत् कम्पनीले नेपाल धितो पत्र बोर्डमा आवेदन दिईसकेका छन् ।

जलविद्युत् कम्पनीहरु मध्ये दोलखा जिल्लाको सिंगटी खोलामा निर्माणाधीन २५ मेगावाट क्षमताको जलविद्युत आयोजना पनि आईपीओ निष्कासनको तयारीमा रहेको छ ।

सिंगटी हाईड्रो इनर्जीले सर्वसाधारणका लागि ४३ करोड ५० लाख रुपैंयाँ बराबरको आइपीओ जारी गर्न नेपाल धितो पत्र बोर्डबाट अनुमतिको प्रतिक्षामा रहेको छ । प्रतिकित्ता १०० रुपैंया अंकित दरको ४३ लाख ५० हजार कित्ता सेयर खुला गर्ने कम्पनीले जनाएको छ । सिंगटी हाईड्रो ईनर्जी लिमिटेडको आइपीओ निष्काशन तथा बिक्री प्रबन्धकमा मेगा क्यापिटल मार्केट्स रहेको छ ।

पहिलो चरणमा आयोजना प्रभावित स्थानीयका लागि १४ लाख ५० हजार कित्ता र सर्वसाधारणका लागि २९ लाख कित्ता सेयर खुला हुनेछ ।

जलविद्युत कम्पनीले सेयर निष्कासन गर्न धितो पत्र बोर्डमा निवेदन दिनुअघि विद्युत नियमन आयोगबाट समेत स्वीकृत लिनुपर्ने व्यवस्था छ । कम्पनीले उक्त प्रक्रिया पूरा गरिसकेको छ ।

यता पूँजी बजारमा यो साता हाइड्रोपावर कम्पनीहरुमा भने लगानीकर्ताको आकर्षण बढेको छ । मंगलबारसम्म १२ वटा उपसमूहमध्ये ९ वटा उपसमूहको सूचक नकारात्मक देखिएको छ भने तीन उपसमूहको सूचक सकारात्मक देखिएको थियो । त्यसमा हाइड्रोपावर उपसमूहको सूचक सबैभन्दा धेरै ३.१२ प्रतिशतले बढेको थियो ।