काठमाडौं - सेयर बजार बुधबार २५.३१ अंकले बढ्दै नेपाल स्टक एक्सचेञ्ज (नेप्से) २७०१.४८ विन्दुमा पुगेको छ। अघिल्लो दिन मंगलबार १६.९५ अंकले घटेको नेप्से त्यसअघि लगातार तीन दिनसम्म बढेको थियो। आइतबार नेप्से २९.८२ अंकले बढ्दा गत बिहीबार ४१.४३ अंक र बुधबार ३९.१३ अंकले उक्लिएको थियो।

बुधबार सेयर बजारमा सुधार आए पनि कारोबार रकम घटेको देखिन्छ। आज ५ अर्ब ४४ करोड रुपैयाँको कारोबार भएको छ, जुन मंगलबारको ५ अर्ब ७४ करोडको तुलनामा कम हो। बजारमा १६६ कम्पनीको सेयर मूल्य वृद्धि भए पनि ७८ कम्पनीको मूल्य घटेको छ। मंगलबार भने ४२ कम्पनी मात्र बढेका थिए, भने २०१ कम्पनी ओरालो लागेको थियो।

यस दिन विशाल बजार कम्पनी र सेन्ट्रल फाइनान्सको सेयर सकारात्मक सर्किट लाग्दा बोटलर्स नेपाल बालाजुको सेयर मूल्यमा नकारात्मक सर्किट देखियो।

क्षेत्रगत रूपमा हेर्दा व्यापार समूहको सेयर सर्वाधिक ९.४९ प्रतिशतले बढेको छ भने फाइनान्स समूह ३.२६ प्रतिशतले उक्लिएको छ। बैंकिङ समूह ०.६१ प्रतिशत, विकास बैंक ०.५१ प्रतिशत, होटल तथा पर्यटन ०.५२ प्रतिशत, लगानी समूह १.३९ प्रतिशत, लघुवित्त समूह ०.१२ प्रतिशतले बढेका छन्। भने उत्पादन समूह १.४३ प्रतिशत र निर्जीवन बीमा समूह ०.२५ प्रतिशतले घटेका छन्।