काठमाडौं : सागर डिष्टिलरी लिमिटेडले सर्वसाधारणका लागि प्राथमिक शेयर (आईपीओ) भदौ २५ गतेदेखि निष्काशन तथा बिक्री खुला गर्ने भएको छ। यसअघि कम्पनीले वैदेशिक रोजगारीमा रहेका नेपालीहरूलाई आईपीओ निष्काशन गरी बाँडफाँट गरिसकेको थियो।

नेपाल धितोपत्र बोर्डबाट अनुमति पाएको कम्पनीले कुल ७२ करोड ६० लाख रुपैयाँ जारी पूँजीको २० प्रतिशत अर्थात १४ करोड ५२ लाख रुपैयाँ बराबरको १४ लाख ५२ हजार कित्ता शेयर निष्काशन गर्ने स्वीकृति पाएको हो।

यसको १० प्रतिशत (१ लाख ४५ हजार २०० कित्ता) वैदेशिक रोजगारीमा रहेका नेपालीहरूलाई छुट्याइएर बाँडफाँट भइसकेको छ। यस्तै ५ प्रतिशत (७२ हजार ६०० कित्ता) सामूहिक लगानी कोषका लागि र ४३ हजार ५६० कित्ता कम्पनीका कर्मचारीका लागि सुरक्षित गरिएको छ।

अब भने सर्वसाधारण लगानीकर्ताका लागि ११ लाख ९० हजार ६४० कित्ता आईपीओ निष्काशन गरिँदैछ। यो शेयर प्रतिकित्ता १०० रुपैयाँ अंकित मूल्यमा जारी हुनेछ। यसका लागि आवेदन भदौ २५ गतेदेखि २९ गतेसम्म दिन सकिनेछ। तर सो अवधिभित्र पर्याप्त आवेदन नपरेमा असोज ८ गतेसम्म निष्काशन अवधि लम्बिन सक्नेछ।

लगानीकर्ताले न्यूनतम १० कित्ता र अधिकतम १० हजार कित्तासम्मका लागि आवेदन दिन सक्ने व्यवस्था छ। कम्पनीले आईपीओ निष्काशनका लागि गराएको क्रेडिट रेटिङ्गमा इन्फोमेरिक्स क्रेडिट रेटिङ्ग नेपालले “आईआरएन बी प्लस (Issuer Rating)” प्रदान गरेको छ, जसले कम्पनीको वित्तीय दायित्व पूरा गर्ने क्षमतामा उच्च जोखिम रहेको देखाउँछ।

यस आईपीओको बिक्री प्रबन्धक मुक्तिनाथ क्यापिटल लिमिटेड तोकिएको छ। लगानीकर्ताले नेपाल धितोपत्र बोर्डबाट स्वीकृत आस्बा सेवामा सहभागी बैंक तथा वित्तीय संस्थाबाट सि–आस्बा प्रणालीमार्फत आवेदन दिन सक्नेछन्।