काठमाडौं । साताको तेस्रो कारोबार दिन मंगलबार नेपाल स्टक एक्सचेञ्ज (नेप्से) परिसूचक १३.९५ अंकले घट्दै २,७१२.५४ बिन्दुमा बन्द भएको छ। आज नेप्से ०.५१ प्रतिशतले घटेको हो।

कारोबार अवधिभर बजारमा बिक्री दबाब हाबी रहँदा अधिकांश समय नेप्से रातो संकेतमा कारोबार भएको थियो। दिनभरको उतारचढावपछि बजार दोहोरो अंकको गिरावटसहित बन्द भएको हो।

आज कुल ५ अर्ब १८ करोड ७४ लाख ६७ हजार रुपैयाँभन्दा बढीको कारोबार भएको छ। यस अवधिमा १ करोड १३ लाख २६ हजार ४६५ कित्ता सेयर किनबेच भएको छ।

बजारमा ७७ कम्पनीको सेयर मूल्य बढ्दा १९३ कम्पनीको मूल्य घटेको छ भने ७ कम्पनीको मूल्य स्थिर रहेको छ। बढेका कम्पनीको तुलनामा घट्ने कम्पनीको संख्या निकै बढी रहेकाले बजारमा बिक्रीकर्ता हाबी रहेको देखिएको छ।

लगातार केही दिनको वृद्धि पछि मंगलबार बजारमा सामान्य करेक्सन देखिएको विश्लेषण गरिएको छ। आगामी कारोबारमा लगानीकर्ताको मनोविज्ञान, बैंकिङ प्रणालीको तरलता तथा सूचीकृत कम्पनीहरूको वित्तीय विवरणले बजारको दिशा निर्धारण गर्ने अपेक्षा गरिएको छ।