काठमाडौं, जेठ ८ – सान्भि इनर्जी लिमिटेडले आगामी जेठ ९ गतेदेखि सर्वसाधारणका लागि प्राथमिक शेयर (आईपीओ) निष्काशन गर्ने भएको छ। कम्पनीले प्रतिकित्ता १०० रुपैयाँ अंकित मूल्यमा २४ लाख १५ हजार ३०० कित्ता सेयर निष्काशन गर्न लागेको हो, जसको कुल मूल्य २४ करोड १५ लाख ३० हजार रुपैयाँ हुन्छ।

यसअघि कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकका लागि छुट्टै आईपीओ निष्काशन गरिसकेको छ। आयोजना प्रभावितका लागि ८ लाख ८० हजार कित्ता (रु. ८ करोड ८० लाख) र वैदेशिक रोजगारीमा रहेका नेपालीका लागि २ लाख ९१ हजार कित्ता (रु. २ करोड ९१ लाख) सेयर निष्काशन भइसकेको छ। यस्तै, सामूहिक लगानी कोषका लागि १ लाख ४५ हजार ५०० कित्ता र कम्पनीका कर्मचारीका लागि ५८ हजार २०० कित्ता सेयर छुट्याइएको थियो।

सार्वसाधारणका लागि खोलिने आईपीओमा न्यूनतम १० कित्ता र अधिकतम २० हजार कित्तासम्म आवेदन दिन सकिनेछ। आईपीओमा आवेदन दिने म्याद छिटोमा जेठ १३ गते र ढिलोमा जेठ २३ गतेसम्म रहनेछ।

यस आईपीओको बिक्री प्रबन्धक नेपाल एसबिआई मर्चेण्ट बैंकिङ्ग लिमिटेड रहेको छ। लगानीकर्ताले ‘मेरो शेयर’ सफ्टवेयर प्रयोग गरी सि-आस्बा प्रणालीमार्फत आवेदन दिन सक्नेछन्। साथै, नेपाल धितोपत्र बोर्डबाट स्वीकृत सि-आस्बा सदस्य बैंक तथा वित्तीय संस्थाहरूका तोकिएका शाखाहरूबाट पनि आवेदन दिन सकिनेछ।