काठमाडाैं - साताको अन्तिम कारोबार दिन बिहीबार नेप्से परिसूचकमा उल्लेख्य सुधार देखिएको छ। नेप्से १९.४० अंकले उक्लिएर २,६८८.९१ विन्दुमा पुगेको हो। त्यस्तै सेन्सेटिभ इन्डेक्स पनि १.५९ प्रतिशतले वृद्धि भएको छ।

आज ३१४ कम्पनीका कूल २ करोड २३ लाख ९६ हजार कित्ता सेयर किनबेच हुँदा कूल कारोबार रकम ९ अर्ब ८२ करोड २० लाख रुपैयाँ नाघेको छ। यसअघिको दिन नेप्से झण्डै ८ अंकले घटे पनि कारोबार रकम १० अर्बको हाराहारीमा रहेको थियो।

समूहगत सूचक हेर्दा बैंकिङ्ग समूह सबैभन्दा धेरै ३.९४ प्रतिशतले उक्लिएको छ भने लघुवित्त समूह २.६१ प्रतिशतले बढेको छ। म्युचुअल फण्ड र निर्जीवन बिमा समूहमा पनि सामान्य सुधार देखिएको छ। तर होटल तथा पर्यटन समूह २.७८ प्रतिशत र जलविद्युत् समूह १.१० प्रतिशतले घटेका छन्। बाँकी समूहमा भने एक प्रतिशतभन्दा कमको गिरावट आएको छ।

कम्पनीगत तवरमा हेर्दा ओम मेगाश्री फर्मास्युटिकल्सको सेयरमा आज सकारात्मक सर्किट लागेको छ भने एनआइसी एसिया र फर्वाड माइक्रोफाइनान्सका लगानीकर्ताले ७ प्रतिशतभन्दा बढी मुनाफा कमाएका छन्। विपरीत बाराही हाइड्रोपावर र एमबिएल इक्विटी फण्डका लगानीकर्ताले ९ प्रतिशतभन्दा बढी घाटा बेहोरेका छन्।